«Яқин Шарққа сўнгги 3000 йил ичида илк бор тинчлик олиб келдим» – Трамп

АҚШ президенти Дональд Трамп миллатга қилган навбатдаги мурожаатида ўз маъмурияти фаолиятини юқори баҳолаб, мамлакатдаги мавжуд муаммолар учун собиқ президент Жо Байден бошчилигидаги демократларни айблади. Тахминан 20 дақиқа давом этган чиқишида у иқтисод, хавфсизлик, миграция ва ташқи сиёсат масалаларига тўхталиб ўтди.

Трампнинг таъкидлашича, у ҳокимиятга келган пайтда АҚШ «тартибсизлик ҳолатида» бўлган. Унинг сўзларига кўра, демократлар даврида мамлакат чегаралари очиқ қолиб, АҚШга ноқонуний мигрантлар, жумладан жиноятчилар ҳам кириб келган. Шунингдек, у олдинги маъмуриятни миллий манфаатларни эмас, балки «бошқа давлатлар ва гуруҳлар манфаатини ҳимоя қилган»ликда айблади.

Президент Трамп охирги 11 ой ичида ўз маъмурияти АҚШ тарихидаги энг катта ижобий ўзгаришларни амалга оширганини таъкидлади. Унинг сўзларига кўра, сўнгги ойларда мамлакатга бирорта ҳам ноқонуний мигрант кириб келмаган. Бу ҳолатни у қатъий сиёсий ирода ва янги сиёсат натижаси сифатида баҳолади.

Хавфсизлик масалаларига тўхталар экан, Трамп Вашингтон ҳозир «энг хавфсиз даврни» бошдан кечираётганини айтди. У наркокартелларга қарши кураш кучайтирилганини, АҚШ армияси эса дунёдаги энг қудратли куч бўлиб қолишини алоҳида қайд этди. Шу билан бирга, у бир неча халқаро можароларни бартараф этганини ва Яқин Шарқда тинчлик ўрнатишга ҳисса қўшганини даъво қилди.

«Бу давр ичида мен 8 та урушни бартараф этдим, Яқин Шарққа илк бор сўнгги 3000 йил ичида тинчлик олиб келдим ва исроиллик гаровдагиларнинг озод этилишига ёрдам бердим», – дейди Трамп.

Иқтисодий соҳада эса Трамп инфляция пасайгани, иш ҳақлари ўсиб, янги иш ўринлари яратилаётганини билдирди. Унинг таъкидлашича, бу ютуқларга эришишда божхона божлари муҳим ўрин тутган.

«Божлар – менинг энг севимли сўзим», – дея таъкидлаган президент, айнан шу сиёсат орқали катта молиявий маблағлар АҚШга қайтиб келаётганини айтди.

Чиқиш якунида Трамп Америка халқаро майдонда яна обрў-эътибор қозонганини, мамлакат янги иқтисодий юксалиш остонасида турганини таъкидлади. У яқин йилларда АҚШда футбол бўйича жаҳон чемпионати, Олимпия ўйинлари ўтказилиши, шунингдек, Мустақиллик декларациясининг 250 йиллиги нишонланишини эслаб ўтди.

Президентнинг сўзларига кўра, 2026 йилга келиб дунё АҚШни ўз фуқароларига содиқ, ўз қадриятларига ишонган ва келажагига қатъий ишонч билан қарайдиган қудратли давлат сифатида кўриши керак.