Apple компаниясининг илк буклама смартфони — iPhone Duo эгалари қурилмадан фойдаланиш бошланганидан бир неча соат ёки кун ўтиб, ички экранда ёриқлар пайдо бўлаётганидан шикоят қилмоқда. Компания муаммо мавжудлигини тан олди.

Bloomberg хабар беришича, айрим фойдаланувчилар смартфонни очаётганда чирсиллаган овоз эшитилганини, шундан сўнг экраннинг ўрта қисмидаги букилиш чизиғи бўйлаб ёриқ пайдо бўлганини билдирган. Баъзи қурилмаларда дисплейнинг ўнг томонида оқ нуқталар ва бошқа нуқсонлар ҳам кузатилган.

Apple вакиллари ички дисплей билан боғлиқ муаммо оз сонли қурилмаларда аниқланганини маълум қилди. Компания смартфон эгаларига AppleCare техник ёрдам хизматига мурожаат қилишни тавсия этди.

Электроника таъмирига ихтисослашган iFixit платформаси мутахассислари нуқсон экраннинг ўзи эмас, балки букилиш механизми қисмларидан бири шикастланиши билан боғлиқ бўлиши мумкинлигини тахмин қилмоқда. Apple ҳозирда муаммони текширмоқда. Айрим харидорларга алмаштирувчи қурилмалар берилган, бошқалари эса текширув ёки алмаштиришни кутмоқда.

iPhone Duo 2026 йил сентябрь ойида тақдим этилган. Смартфоннинг халқаро савдоси 23 октябрда бошланган, унинг бошланғич нархи 1999 долларни ташкил этган.