Кинематография агентлиги буюртмасига биноан «CONGLOMERATE STUDIO» МЧЖ томонидан суратга олинаётган «Енгилмас. Токиога йўл» фильмида суратга тушиш учун бир гуруҳ хорижлик актёрлар Ўзбекистонга келди. Бу ҳақда Миллий кинематографияни ривожлантириш маркази ахборот хизмати хабар берди.
Хусусан, япониялик Масая Като, швейцариялик Филип Рейнҳард, америкалик Ричард Ли, япониялик Осаму Ямамото, россиялик Мария Шамшина каби машҳур киноюлдузлари фильмда суратга тушиш учун мамлакатимизга ташриф буюрди.
9 июлга қадар актёрлар фильмнинг Тошкентдаги суратга олиш жараёнларида иштирок этади. Ушбу фильмда Токиода бўлиб ўтган Токио-2020 Олимпия ўйинларида ғалабага эришиб, Ўзбекистон байроғини баланд кўтарган ўзбек ўғлони Баҳодир Жалоловнинг халқаро ютуқлари ҳақида ҳикоя қилинади.