Хорижда олинган таълимни тан олиш тизими енгиллаштирилади

Ўзбекистон хорижда олинган таълимни тан олиш бўйича глобал конвенцияга қўшилмоқда.

Бу ҳақда Қонунчилик палатаси ахборот хизмати маълум қилди.

Қайд этилишича, Олий Мажлис Қонунчилик палатасининг навбатдаги мажлисида “Олий таълимга оид малакаларни тан олиш тўғрисидаги глобал конвенцияни (Париж, 2019 йил 25 ноябрь) ратификация қилиш ҳақида”ги қонун лойиҳаси кўриб чиқилди.

Мазкур ҳужжат — Бирлашган Миллатлар Ташкилотининг олий таълим соҳасига оид биринчи глобал шартномаси бўлиб, у дунё бўйлаб олий таълим муассасаларига кириш ва улар ўртасида академик мобилликни кенгайтиришга хизмат қилади.

Қонунда таълим ҳужжатлари ва малакаларни тан олишнинг универсал тамойиллари белгиланган бўлиб, у адолатли, шаффоф ва камситилмайдиган асосда амалга оширилиши кўзда тутилган.

Ратификация натижасида хорижда олинган диплом ва малакаларни тан олиш жараёни янада енгиллашади, бу эса ўз навбатида талабалар, ўқитувчилар ва тадқиқотчиларнинг халқаро миқёсда эркин ҳаракатланишига кенг имконият яратади.

Шу билан бирга, ушбу конвенция Ўзбекистонга таълим соҳасидаги етакчи давлатлар билан икки томонлама ҳамкорликни ривожлантириш, илмий ҳамкорлик ва академик алмашинувларни кенгайтириш имконини ҳам беради.