Хитойда 2026 йилнинг дастлабки тўққиз ойи давомида 4,65 миллионта никоҳ қайд этилди — бу ўтган йилнинг шу даврига нисбатан қарийб 10 фоизга кам. Бу сўнгги 18 йил ичидаги энг паст кўрсаткичдир. South China Morning Post нашри хабарига кўра, қайд этилган никоҳлар сони 504 мингтага қисқарган.
Никоҳлар сонининг камайиши йил давомида тезлашган. Биринчи чоракда 1,7 млн, иккинчи чоракда 1,58 млн ва учинчи чоракда 1,37 млн никоҳ қайд этилган. 2025 йилнинг мос даврлари билан солиштирганда, кўрсаткичлар тегишлича 6%, 9% ва 15% га камайган.
Шу билан бирга, январь-сентябрь ойларида Хитойда 2,08 миллионта ажралиш қайд этилган. SCMP томонидан сўралган демографлар 2026 йил якунлари бўйича ҳам никоҳлар сони ўтган йилги даражадан паст бўлишини кутишмоқда.
Никоҳлар сонининг қисқариши аҳоли сони бир неча йилдан бери камайиб бораётган ва туғилиш рекордона паст даражада қолаётган Хитойдаги демографик муаммоларни янада чуқурлаштирмоқда. Мамлакатда аҳолининг қариши давом этмоқда, бу эса иқтисодиёт ва ижтимоий тизимга қўшимча босим яратмоқда.
ХХР Миллий статистика бюроси маълумотларига кўра, 65 ёшдан ошган аҳоли сони илк бор 14 ёшгача бўлган болалар сонидан ошиб кетди: 223 миллион кишига қарши 213 миллион киши. Ушбу ёш гуруҳларининг улуши тегишлича аҳолининг 15,9 фоизини ва 15,1 фоизини ташкил этмоқда.
"Майли мени ўлдиришсин. Лекин... "
Актриса Нилуфар Ҳамидова 7 суткага қамалди
Ўзбекистонда кескин совуқ ва кучли ёғингарчилик кутилмоқда
