Хитой Россияга сармоя киритишни чеклайди

The Bell эътиборига Финляндия Ривожланаётган Иқтисодиётлар Институти (BOFIT) ҳисоботига кўра, 2022-2023 йилларда Хитойнинг Россия лойиҳаларига киритган инвестициялари ҳажми йилига ўртача 400 миллион долларни ташкил этди - бу кўрсаткич 1,2 миллиард долларга этган 2011-2018 йиллардагидан уч баравар кам .

Хитойлик сармоядорлар, аксарият хорижий компаниялар сингари, Россиядаги фаолиятини қисқартириш йўлини танладилар. Россия Федерацияси Марказий банки маълумотларига кўра, урушнинг уч йили давомида иқтисодиётнинг реал секторига норезидент сармоялари ҳажми 57 фоизга камайди - 2022 йил бошида 497,7 миллиард доллардан 2025 йил бошида 216 миллиард долларгача. Бу 2009 йилдан бери энг паст кўрсаткичдир.

Май ойи бошида Хитой раҳбари Си Цзиньпин билан учрашувда Россия президенти Владимир Путин Россияда хитойлик бизнес учун қулай шарт-шароитлар яратишга тайёрлигини маълум қилди ва икки томонлама муносабатларни “ХХI асрдаги давлатлараро ҳамкорлик модели” деб атади. У Хитой компанияларини Россия ҳудудида ишлаб чиқаришни ривожлантиришга таклиф қилди.

Бироқ, таҳлилчиларга кўра, бундай баёнотлар ортидан Пекин томонидан реал ҳаракатлар кузатилмаган. Хитой ҳукумати Россиянинг нефт ва газ секторига сармоя киритишни тақиқлади, автомобил ишлаб чиқарувчиларга Россия Федерациясида заводлар қурмасликни тавсия қилди ва “Сибир кучи 2” лойиҳасини молиялаштиришда иштирок этишдан бош тортди.

American Enterprise Institute маълумотларига кўра, Хитойнинг Россиядаги сўнгги йирик инвестиция лойиҳаси 2021 йилда амалга оширилган. Ўша пайтда Sinopec нефть саноатига 360 миллион доллар сармоя киритган. Ўшандан бери хитойлик корхоналарнинг Россия Федерациясида йирик сармоялари қайд этилмаган.