Хитой Исроилнинг Қатардаги ҲАМАС делегациясига ҳужумига муносабат билдирди

Хитой Исроилнинг Қатар пойтахти Дохада ҲАМАС музокарачилари жойлашган бинони ҳаводан уришини кескин қоралади.

Хитой Ташқи ишлар вазирлиги матбуот котиби Лин Цзян Пекиндаги брифингда шундай деди:

“Биз Исроилнинг Қатарнинг ҳудудий яхлитлиги ва миллий хавфсизлигини бузган ҳужумини қатъий қоралаймиз. Куч ишлатиш Яқин Шарққа тинчлик олиб келмайди, муаммоларни фақат мулоқот ва музокара йўли билан ҳал қилиш мумкин”.

Унга кўра, Исроил Г‘азода отишмани тўхтатиш бўйича музокараларни қасддан издан чиқаришга ҳаракат қилмоқда. Хитой эса Тель-Авивни кескинликни кучайтирмасликка, балки урушни тугатиш учун конструктив қадамлар ташлашга чақирди.

Шунингдек, Лин Цзян АҚШнинг Яқин Шарқ масалаларидаги “мутлақо мувозанатсиз позицияси” минтақада кескинликнинг янада кучайишига олиб келаётганини қайд этди.

📰 Бир кун олдин Исроил Дохада ҲАМАС делегацияси жойлашган бинога ҳаво ҳужуми уюштирган эди. ХАМАС маълумотича, ҳужум натижасида ҳаракат сиёсий бюроси аъзоси Халил Ҳаййенинг ўғли, унинг тўрт нафар ҳамроҳи ва бир нафар қаторлик полициячи ҳалок бўлган.