Хитой экспортдан импортга қараганда 1 трлн доллардан кўпроқ маблағ олди

Хитойнинг ташқи савдо профицити 2026 йилнинг дастлабки 10 ойида 1,04 трлн долларга етди. Бу кўрсаткич ўтган йилги рекорд натижадан ҳам юқори.

Январь–октябрь ойларида Хитой 3,78 трлн долларлик товар экспорт қилди, импорт эса 2,74 трлн долларни ташкил этди.

Октябрнинг ўзида экспорт йиллик ҳисобда 35,2 фоизга ошди. Ўсишда электромобиллар, қуёш панеллари, серверлар, кабеллар ва маълумотлар марказлари учун бошқа ускуналар муҳим ўрин тутди.

Хитойнинг Европа билан савдо профицити ҳам кескин ўсиб, йилнинг дастлабки 10 ойида 320,8 млрд долларга етди. Бу Европада, айниқса Германияда, маҳаллий саноат ва иш ўринлари учун хавотирни кучайтирмоқда.
Бироқ рекорд даражадаги профицит Хитой иқтисодиётидаги ички муаммоларни ҳам кўрсатади. Мамлакатда уй-жой бозоридаги пасайиш ва аҳолининг харажатларни қисқартириши ички талабни заифлаштирмоқда.

Шу сабабли Хитой иқтисодиёти тобора кўпроқ экспорт ва ишлаб чиқаришга таяниб бормоқда.