Винисиуснинг Алонсо билан муносабатлари ёмонлашди. У «Реал»ни тарк этиш ҳақида ўйлай бошлади

Мадриднинг “Реал” жамоаси ҳужумчиси Винисиус Жуниор клубни тарк этиши мумкин. Бу ҳақда AS нашри ESPN маълумотларига таяниб хабар берди.

Манбага кўра, бразилиялик футболчи сўнгги кунларда жамоани тарк этиш ҳақида жиддий ўйлаб қолган. Унинг фикрича, клубдаги мақоми ва жамоага қўшган ҳиссаси етарлича баҳоланмаяпти. Шунингдек, Винисиус бош мураббий Хаби Алонсо билан муносабатлар тобора таранглашиб бораётганини ҳис қилмоқда.

Айни дамда футболчи ўзини Алонсо тактик режаларида муҳим ўрин эгасидек сезмаяпти. Бу келишмовчилик айниқса “Барселона”га қарши (2:1) кечган сўнгги “эл-классико”да кучайган. У ўйиннинг 72-дақиқасида Родриго билан алмаштирилганидан кейин норозилик билдириб, баҳсдан сўнг дарҳол кийиниш хонасига кетган эди.

Манбаларнинг ёзишича, уларнинг муносабатлари бутунлай бузилмаган, бироқ анча совуқлашган. Винисиус яқин кунларда жамоадошлари билан вазиятни муҳокама қилиб, кейин шахсан Алонсо билан суҳбатлашиши кутилмоқда.

Винисиус Жуниорнинг “Реал” билан амалдаги шартномаси 2027 йилгача мўлжалланган.