Венгрия Бош вазири: “Европа Иттифоқи иқтисодиёти таназзулга юз тутмоқда”

Бугунги норасмий Европа Иттифоқи саммити Европа иқтисодиётининг пасайиши туфайли чақирилди.

Венгрия Бош вазири Виктор Орбан бу ҳақда Брюссел яқинидаги Алден Биссен қалъасида бўлиб ўтган саммитдан олдин маълум қилди.

"Брюсселда Европа рақобатбардошлигини йўқотаётгани айтилмоқда. Биз Европа иқтисодиётининг пасайиб кетмаслиги, аксинча, яна ўсиши ва ривожланишини таъминлаш учун нима қилиш кераклигини муҳокама қилиш учун йиғилдик", деди Орбан.

Унинг сўзларига кўра, Украинадаги урушга тезда чек қўйиш иқтисодий тикланишнинг калитидир. "Биринчидан, уруш иқтисодиёт учун зарарли, шунинг учун тинчликка имкон қадар тезроқ эришиш керак. Иккинчидан, агар сизда пул бўлса ва Европа Иттифоқида пул бўлса, уни бошқа жойга юборманг. Масалан, уни Украинага юборманг", деди у.

Орбан шунингдек, Европа компанияларининг рақобатбардошлигини қўллаб-қувватлаш учун энергия нархларини пасайтириш зарурлигини таъкидлади. "Биз шундай қилишимиз керак, бу жуда оддий", деб қўшимча қилди бош вазир.

Венгрия бош вазири ҳар бир мамлакат Венгрия каби ўз суверенитетини “таҳдидлар ёки шантаж”ларга берилмасдан ҳимоя қилиши кераклигини таъкидлади. У шу ҳафта бошида Европа Иттифоқи ҳукуматларига юборилган ва аъзо давлатларнинг вето ҳуқуқларини четлаб ўтиш эҳтимоли ҳақида сўз юритилган хатга изоҳ берди.