«Вақф» фондига 6 ойида қанча пул келиб тушгани маълум қилинди

«Вақф» хайрия жамоат фонди томонидан 2021 йилнинг ўтган олти ойи давомида 11 миллиард сўмдан ортиқ маблағ хайрия сифатида сарфланган. Бу ҳақда бугун АОКАда бўлиб ўтган брифингда Вақф хайрия жамоат фонди ахборот хизмати раҳбари Саидаброр Умаров маълум қилди.

Унинг қайд этишича, 2021 йил 1 январдан 30 июнь санасига қадар фондга хайрия, закот, вақф мулклари, зиёратгоҳлар, диний ташкилотлар ва акциялар орқали 21 315 999 344 сўм келиб тушган. Фонд ҳисоб рақамларидан ўтган 6 ой давомида 17 395 090 948 сўм, ҳомийлар ва ҳамкор ташкилотлар томонидан тақдим этилган моддий кўринишдаги эҳсонлар билан қўшиб ҳисоблаганда жами 21 403 394 440 сўм сарфланган.

Жумладан, фақатгина хайрия ишлари доирасида:

• диний таълим муассасалари, илмий-тадқиқот марказлари фаолиятини молиялаштириш учун – 1 080 601 500 сўм;
• диний таълим муассасалари профессор-ўқитувчилари, ўқувчи-талабаларини моддий ва ижтимоий қўллаб-қувватлаш учун – 347 016 908 сўм;
• диний таълим муассасалари ўқувчи-талабалар контракти учун – 840 000 000 сўм;
• ижтимоий ҳимояга муҳтож оилалар талаба фарзандларини қўллаб-қувватлаш учун – 15 450 000 сўм;
• Сардоба фожиасида вайрон бўлган «Юсуф» масжиди қайта қурилиши учун – 313 000 000 сўм;
• масжидлар ва зиёратгоҳлар ходимларини моддий ва ижтимоий қўллаб-қувватлаш учун – 69 400 000 сўм;
• уйи ёнган фуқароларга моддий ёрдам учун – 90 000 000 сўм;
• фондга мурожаат қилган фуқароларга пул маблағи кўринишида берилган моддий ёрдам учун – 6 139 398 937 сўм;
• аҳолининг ижтимоий ҳимояга муҳтож қатламлари, шу жумладан имконияти чекланган, ногиронлиги бор бўлган шахсларни моддий қўллаб-қувватлаш учун – 1 628 865 000 сўм;
• турли хайрия тадбирлари учун – 386 540 000 сўм;
• вилоят вакилликлари томонидан берилган аризаларга кўра – 383 000 000 сўм сарфланган.

«Жами 11 293 272 345 сўм фақатгина хайрия йўналишларида сарфланган бўлиб, бу кўрсаткич фонд томонидан ўтган йилнинг худди шу даврида қилинган хайрия ишлари маблағларига нисбатан 5 миллиард сўмга, ёки 50 фоизга кўпроқ бажарилган», — деган Саидаброр Умаров.

Унинг маълум қилишича, ушбу маблағлардан ташқари Ўзбекистонда фаолият олиб бораётган масжидлар ва фонд тасарруфидаги зиёратгоҳларнинг маъмурий харажатлари, уларни молиявий қўллаб-қувватлаш ҳамда ободонлаштириш учун 10 миллиард сўмдан ортиқ маблағ йўналтирилган.

«Фонд маблағлари айланиши ва шаффофлигини таъминлаш мақсадида фондга тушган маблағлар ҳар куни vaqf.uz сайти фонднинг ижтимоий тармоқларидаги саҳифаларида ёритиб борилди», — деб таъкидлаган Вақф хайрия жамоат фонди ахборот хизмати раҳбари Саидаброр Умаров.