Ўзбекистонга пул ўтказмалари ҳажми икки йилдан кейин 20 млрд. долларга етиши мумкин

Марказий банкнинг 2025 йилга ва 2026-2027 йилларга мўлжалланган пул-кредит сиёсати концептуал лойиҳасининг асосий сценарийси доирасидаги прогнозда қайд этилишича, жорий йил охиригача Ўзбекистонга трансчегаравий пул ўтказмалари ҳажми 25-30 фоизга – 14,5-15 миллиард долларгача ошади.

2025-2027 йилларда пул ўтказмаларининг йиллик ўсиши «фундаментал тенденция доирасида» 10-15 фоизга ва 20 миллиард долларга етиши кутилмоқда.

Мамлакатларнинг миграция оқими диверсификацияси ўсишда давом этиши, юқори даромадли мамлакатлардан пул ўтказмалари уларнинг улушини ошириши кутилмоқда.

Прогнозларда қайд этилишича, доллар, рубль курси ва Россия иқтисодиётининг пул ўтказмалари ҳажмига таъсири аста-секин камаяди (шок ҳодисаларини ҳисобга олмаган ҳолда).

Муқобил сценарийга биноан, давом этаётган санкцияларнинг кучайиб бораётган таъсири туфайли рубль сезиларли даражада қадрсизланиши мумкин. Бу, бир томондан, меҳнат мигрантларининг Ўзбекистонга пул ўтказмалари ҳажмининг камайишига олиб келса, иккинчи томондан, импорт инфляциясини оширади (импорт товар ва хизматлар нархининг ошиши туфайли мамлакат ички бозорида нархлар даражасининг ошиши).

Муқобил сценарийга кўра, 2025 йилда ўтказмалар ҳажмининг қисқариши (минус 7-10 фоиз) ва 2026-2027 йилларда асосий тенденцияга нисбатан секинроқ суръатда (+7-11 фоиз) ўсиши прогноз қилинмоқда. Пул ўтказмалари ҳажмининг қисқариши аҳоли даромадлари ўсишини секинлаштиради ва ялпи истеъмол талабининг мақбуллашишига таъсир қилади.

Маълумот ўрнида айтиш жоиз, жорий йилнинг январь-сентябрь ойларида Ўзбекистонга пул ўтказмалари ҳажми 34,8 фоизга ошиб, 11,3 млрд. долларни ташкил этди. Жанубий Корея, Буюк Британия, Польша ва БААдан тушумлар кескин ошди, Россиянинг улуши эса пасайишда давом этмоқда.

Ўзбекистон иқтисодиётида пул ўтказмалари муҳим ўрин тутади. Меҳнат муҳожирларининг пул ўтказмалари кўплаб оилаларнинг даромадларини қўллаб-қувватлайди (айрим ҳудудларда улар умумий даромаднинг чорак қисмини ташкил этиши мумкин), ички талаб ва истеъмолнинг ўсишига ёрдам беради, миллий валюта барқарорлигини сақлайди.