2023 йил бошидан бугунга қадар 900 та қимматбаҳо дарахтлар кесилган бўлса, ўтган йили бу кўрсатгич 1300 дан ортиқни ташкил этган.
ТОШКЕНТ, 29 ноя — Sputnik. Ўзбекистонда қимматбаҳо дарахтларнинг кесилиши 48 фоизга камайди. Бу ҳақида “Яшил макон” умуммиллий лойиҳасини ташкиллаштириш ва мониторинг бошқармаси бош мутахассиси Ўлмас Собиров.
“Ҳар қандай дарахтларни кесиш қонунан тақиқланади. Бу учун тегишли жавобгарлик ҳам белгиланган. Бугунги кунда Давлат экология қўмитасининг инспекциялари ҳудудларда назоратни кучайтирган. Шунингдек, 16 та дрон, 600 дан ортиқ кузатув камералари, 260 та патрул хизматлари орқали экологик назорат тизими йўлга кўйилган. Натижада қимматбаҳо дарахтларнинг кесилиши ўтган йилга нисбатан 48 фоизга камайишига эришилди", – деди Собиров.
Унинг қайд этишича, 2023 йил бошидан бугунга қадар 900 та қимматбаҳо дарахтлар кесилган бўлса, ўтган йили бу кўрсатгич 1300 тадан ортиқни ташкил этган.
Ўтган давр мобайнида “Яшил макон” умуммиллий лойиҳаси доирасида 588 гектар “яшил боғлар”, 662 гектар “яшил жамоат парклари”, Бухоро, Нукус, Хива ва Урганч шаҳарлари атрофида жами 40 км масофада “яшил белбоғ”лар барпо этилди.
Эслатиб ўтамиз, яшил экинларни асрашга қаратилган қўшма лойиҳа бошланмоқда. Дастлабки лойиҳа Тошкент шаҳрида бошланади. Мақсад яшил экинларни, шу жумладан, қурилишни режалаштириш босқичида асраш ҳамда уларнинг тўлиқ ҳисобини жорий этиш, шунингдек, ноқонуний кесиш ҳолатларида чора кўришдир.