Ўзбекистон туризм соҳасида «Энг яхши ривожланаётган йўналиш» мукофотига сазовор бўлди

Лондонда бўлиб ўтган маросимда Ўзбекистон нуфузли «Wanderlust Reader Travel Awards 2024» мукофотининг «Энг яхши ривожланаётган йўналиш» номинациясида ғолиб бўлди.

Тақдирлаш маросими машҳур «Tate Modern» замонавий санъат галереясида бўлиб ўтди.

«Wanderlust Reader Travel Awards 2024» мукофоти "Wanderlust" журнали томонидан ўтказиладиган йўналишлар ва туроператорлар учун нуфузли танловдир. Журнал ходимлари ҳар бир мукофот тоифаси учун қисқа рўйхатларни яратадилар ва ғолиблар ўқувчилар томонидан танланади. Бу йил 3,6 миллиондан ортиқ овоз берилган.

1993 йилда ташкил этилган «Wanderlust» Буюк Британиядаги ўқувчилар учун 1-рақамли саёҳат журнали ҳисобланади. «Wanderlust» йилига деярли 140 минг нусхада 10 та сон чиқаради ва унинг веб-сайти ҳар ой 1,2 миллион ноёб ўқувчиларни жалб қилади.