Ўзбекистон ташқи ишлар вазирининг ўринбосари Музаффар Мадраҳимов кеча Франция элчиси Аурелия Бушез билан учрашув ўтказди, деб хабар қилмоқда «Дунё» АА мухбири.
ТИВ маълумотига кўра, музокаралар чоғида Ўзбекистон ва Франция раҳбарлари ўртасида эришилган барча келишувларни тўлиқ амалга ошириш муҳимлиги таъкидланди.
Томонлар Ўзбекистон-Франция муносабатлари кун тартибидаги долзарб масалаларни муҳокама қилдилар. Парламентлараро мулоқотни кучайтириш, ўзаро ҳамкорликнинг ҳуқуқий асосларини кенгайтириш, маданий-гуманитар ва таълим соҳасидаги алмашинувларни чуқурлаштириш бўйича таклифлар кўриб чиқилди.
Иқтисодий дипломатияни фаол ривожлантиришга алоҳида эътибор қаратилди. Шу нуқтаи назардан, савдо-иқтисодий ҳамкорлик бўйича Ҳукуматлараро комиссиянинг навбатдаги мажлисини ўтказиш, Франциянинг «Semmaris», «Suez», «Alstom» ва бошқа етакчи компаниялари билан қўшма инвестиция лойиҳаларини амалга ошириш юзасидан фикр алмашилди.