UzAuto Motors Cобалт учун 22 мингтадан ортиқ шартнома тузди

Аввалроқ UzAuto Motors 11 декабрь куни «Chevrolet Cobalt» автомобили учун контрактацияни очиши ҳақида хабар берилганди.

Чоршанба куни ўтказилган шартнома бериш жараёни соат 14:48 ҳолатига якунланган. Бу ҳақда компания матбуот хизмати маълум қилди.

Savdo.uzavtosanoat.uz платформасида GX-Style AT Plus вa GX-Midnight AT модификацияси учун жами 22 003та шартнома тузилди.

Шундан 21 933таси «One-ID» тизимида рўйхатдан ўтган жисмоний шахслар, 70таси эса юридик шахслар томонидан амалга оширилган. Ўз навбатида, реализация қилинган автомобилларнинг 6 574 донаси «GX-Style AT Plus», 15 429 донаси «GX-Midnight AT» ҳиссасига тўғри келади.

Онлайн контрактация жараёнида «UzAutoSavdo» тизимида 22,7 минг киберҳужум амалга оширилди. Платформа фаолиятида узилишлар кузатилмади.

Тизимда бу вақт ичида 6 мингдан ортиқ фаол сеанслар ва сониясида 3 мингдан ортиқ уланишлар қайд этилди. «Cалл-маркази» орқали 1 362 мижоз мурожаати қабул қилиниб, кўриб чиқилди.

«UzAuto Motors» фуқаролардан фирибгарлардан эҳтиёт бўлишларини, эълонлар сайти ва бошқа сервислар орқали «шартнома сотиб олиш» бўйича шубҳали таклифларга рози бўлмасликларини сўрамоқда. «UzAutoSavdo» платформасида харидор ёки дилер мижоз маълумотларини ўзгартириш имкониятига эга эмас.