Украина уруши туфайли Россияда ногиронлар сони рекорд даражада ошди

Украина билан уруш Россияга Псков ёки Жанубий Сахалин аҳолиси сонига тенг “ногиронлар армияси”ни берди, деб ёзади The Moscow Times газетаси.

Россия федерал статистика хизматининг Ягона идоралараро ахборот-статистика тизимида эълон қилинган Россия Ижтимоий жамғармаси маълумотларига кўра, 2023-2024 йилларда мамлакатда ногиронларнинг умумий сони 190 мингга кўпайган.

Ўтган йилнинг охирига келиб, мамлакатда ногиронлар сони 11 миллион 122 мингга етган, бу кўрсаткич 2023 йилда 11,04 миллион ва 2022 йилда 10 миллион 932 мингга тенг эди. Ахборот-статистика тизими маълумотларига кўра, ногиронлар сонининг ўсиш суръати 2007 йилдан бери энг юқори кўрсаткич ҳисобланади.

Халқаро стратегик тадқиқотлар институтининг (IISS) маълум қилишича, 2024 йилнинг охирига келиб, 376 минг россиялик фронтда оғир яраланган ва ногирон бўлиб қолган. IISS ҳисоб-китобларига кўра, Россия армиясининг 2022-2024 йиллардаги умумий йўқотишлари тахминан 783 минг кишини ташкил этган. Улардан камида 172 минг нафари ҳалок бўлган, 611 минг киши яраланган. Ярадорларнинг қарийб 235 минг нафари тузалиб кетган, қолганлари эса бутун умрга ногирон бўлиб қолган.