Украина учун ҳам “Тинчлик кенгаши” тузиладими?

АҚШ Украина учун ҳам “Тинчлик кенгаши” тузиш имкониятини кўриб чиқмоқда — Financial Times.

Нашр манбаларига кўра, мазкур ташаббус Қўшма Штатлар президенти Трамп воситачилигида ишлаб чиқилган Ғазо бўйича тинчлик режаси модели асосида бўлиши кўзда тутилмоқда. Ушбу кенгашга АҚШ президентининг ўзи раислик қилиши мумкин.

АҚШ билан музокараларда қатнашаётган юқори мартабали украиналик амалдорнинг айтишича, Украина учун “Тинчлик кенгаши” Россиянинг агрессиясини якунлашга қаратилган муҳим таклифлардан бири ҳисобланади. Кенгаш таркибига Украина, Европа давлатлари, NATO ва Россия вакилларини киритиш режалаштирилмоқда. Унинг вазифаси бўлажак тинчлик режасининг бажарилишини кафолатлаш ва назорат қилиш бўлади.

"Ҳозирча Россиянинг АҚШ, Украина ва унинг Ғарбдаги иттифоқчилари томонидан келишилган 20 бандли тинчлик режасига рози бўлишга ёки ҳатто уни жиддий муҳокама қилишга тайёрлигидан дарак берувчи ҳеч қандай аломат йўқ. Москва Украинадан ҳудудий ён беришни талаб қилмоқда, Киев эса бу талабларни қатъий рад этиб келмоқда", дея ёзмоқда Financial Times.

Нашр маълумотига кўра, Трамп маъмурияти “Тинчлик кенгаши” моделини бошқа можароларни, жумладан Украина ва Венесуэладаги низоларни ҳал этишда ҳам қўллаш имкониятини кўриб чиқмоқда. Ушбу режа келаси ҳафта Давосда бўлиб ўтадиган Жаҳон иқтисодий форумида тақдим этилиши мумкин.