Украина президенти офиси собиқ раҳбари Андрей Ермак пул ювишда гумонланмоқда

Бу ҳақда Украина Миллий коррупцияга қарши бюроси (НАБУ) ва Коррупцияга қарши ихтисослаштирилган прокуратура (“САП”) хабар берди.

САП маълумотларига кўра, гап Киев яқинида элита кўчмас мулк қурилиши доирасида пул ювиш билан боғлиқ уюшган жиноий гуруҳ фаолияти ҳақида кетмоқда. Қурилиш лойиҳаси орқали қарийб 460 миллион гривна (10 миллион доллардан ортиқ) маблағ легаллаштирилган. Хусусан, Козин қишлоғидаги “Династия” деб номланган мажмуада ҳар бири 1000 квадрат метр бўлган тўртта қароргоҳ қуриш режалаштирилган. Шунингдек, лойиҳада уй эгалари учун умумий спорт зали, бассейн ва спа-зонага эга бешинчи махсус бино қурилиши ҳам кўзда тутилган.

Андрей Ермак ҳозирча вазиятга батафсил изоҳ беришдан бош тортмоқда.

"Мен ҳозир ҳеч қандай изоҳ бермайман. Тергов ҳаракатлари якунлангач, муносабат билдираман. Менинг бирорта ҳам ҳашаматли уйим йўқ, фақат битта квартирам ва сиз кўрган битта автомобилим бор", — деди у.

Аввалроқ Ермакка нисбатан тергов ҳаракатлари олиб борилаётгани ҳақида “Украинская правда” ўз манбаларига таяниб хабар берганди. Бироқ у нимада гумонланаётгани номаълум бўлган. 2025 йилнинг ноябр ойида “Энергоатом” иши доирасида унинг уйида тинтув ўтказилган, шундан сўнг у Президент офиси раҳбари лавозимидан озод этилганди.