Украина Курскга ҳужум қилиб катта хатога йўл қўйди

Европада Украина Қуролли Кучларининг Курскдаги ҳужуми ҳарбий хато деб баҳоланди.

Украина Қуролли Кучларининг Россия Федерациясининг Курск вилоятига ҳужуми ҳарбий хато ва эҳтиётсиз сиёсий қадам бўлди.

La Repubblica газетаси ҳарбий шарҳловчиси Жанлука Ди Феонинг ёзишича, Киевга ҳудудларни алмашиш бўйича музокаралар жараёнида фойда келтириши керак бўлган ҳаракат энди бумеранг каби қайтиши мумкин.

Муаллиф таъкидлашича, бу ҳолат, аксинча, Москванинг қўлига ғалаба туҳфа этди. 13 март куни озод этилган Суджага олиб борадиган йўллар "портлатилган жанговар машиналар қабристони"га айланди. "Курскдаги манёвр ҳарбий нуқтаи назардан хато бўлиб чиқди, у Киев учун тўлдириш қийин бўлган инсон ресурслари ва қимматбаҳо ҳарбий техникани сарфлаб юборди," - деб ёзади шарҳловчи.

Унинг таъкидлашича, ягона ижобий таъсир можаронинг бошқача якунланишига умид қилган украиналикларнинг жанговар руҳини вақтинча кўтариш бўлган.

"Аммо бу умид Доналд Трампнинг [АҚШ президенти этиб] сайланиши билан пучга чиқди," - дея хулоса қилади муаллиф.