Туркия - Европанинг охирги таянчими?

Европа Иттифоқи хавфсизлик, қуролланиш ва Украинани қўллаб-қувватлаш масалаларида Туркиянинг ёрдамига ҳар қачонгидан ҳам кўпроқ муҳтож. Бу ҳақда Британиянинг The Economist газетаси таҳлилий мақоласида ёзади.

Мудофаа секторида Туркия чекланган манбалар билан ҳам таъсирчан натижалар кўрсатди ва мудофаа саноати ҳақиқий бумни бошдан кечирмоқда.

Мамлакатда Eвропанинг ўқ-дориларга бўлган талабининг камида бир қисмини қондиришга қодир саноат базаси мавжуд. The Economist'нинг қайд этишича, Туркия Европа мудофаасида НАТО доирасида ҳам, ундан ташқарида ҳам муҳим рол ўйнаши мумкин. Масалан, Байкар ва италиялик Леонардо ўртасидаги ҳамкорлик, шунингдек , Алтай танки ва бешинчи авлод Kaan қирувчи самолётлари лойиҳалари.

Турк компаниялари учун Европа билан мудофаа соҳасида ва Украина масалаларида ҳамкорлик қилиш мантиқий ва фойдали кўринади. Бу Европа Иттифоқи келгуси йилларда мудофаа учун сарфлашни режалаштирган юзлаб миллиард еврога кириш имконини беради. Анқара ҳам Украинадаги етакчи сармоядор ҳисобланади ва унинг тинчликпарвар иштироки турк пудратчилари учун янги имкониятлар очади.

Мақола муаллифлари, шунингдек, АҚШ президенти Доналд Трампнинг сиёсати кўплаб глобал жараёнларни сезиларли даражада ўзгартирганини таъкидлаб, “ Туркия ўзгармади, қолган ҳамма нарса ўзгарди. Тўсатдан Доналд Трамп Америкаси билан солиштирганда Туркия ишончли иттифоқчи бўлиб кўринади ”.

Мақолада таъкидланишича, Россия билан боғлиқ хавотирлар фонида Брюссел Туркия позициясини тобора кўпроқ тушуниб, қабул қила бошлаган. Энди мафкуравий тафовутлар эмас, амалий манфаатлар биринчи ўринда туради - бу Украина учун ҳам, Европа мудофааси учун ҳам яхши янгилик.