Россиянинг Тула вилоятида мигрантларга жамоат транспортида ҳайдовчи бўлиши ва айрим савдо шохобчаларида ишлаши тақиқланиши мумкин. Губернаторнинг тегишли фармони лойиҳаси вилоят ҳукумати сайтида эълон қилинган.
Ҳужжатга кўра, 2024 йил 1 январдан Тула ҳудудида патент асосида меҳнат қилаётган чет эллик фуқароларга қуйидаги соҳаларда ишлаш тақиқланади:
алкогол сотишга ихтисослашган дўконларда;
тамаки маҳсулотларини сотишга ихтисослашган дўконларда;
йўловчи ташишни амалга оширувчи ташкилотларда (ҳам шаҳар ичида, ҳам шаҳар ташқарисида);
умумий овқатланиш ташкилотларида – қаҳвахона, ресторан ва ҳоказолар.
Аниқлик киритилишича, минтақада 1 январга қадар бу соҳаларда бўлган хорижлик ишчилар сонини тартибга солиш учун тайёргарлик тадбирлари бўлиб ўтади.
