Трампнинг йиллик молиявий декларациясида бир қатор шубҳали тасодифлар қайд этилди

Шунингдек, йиллик молиявий декларацияда 2025 йил давомида акциялар билан боғлиқ 21 мингдан ортиқ битимлар қайд этилди

CNBC'нинг ёзишича, энг кўзга кўринарли ҳолат 8 апрел куни, бозор кескин қулаган бир пайтда, Трамп Apple, Nvidia ва Amazon акцияларининг 327 та пакетини сотиб олгани билан боғлиқ.

Бу техногигантлар қимматли қоғозлари нархи кескин тушган тўрт кунлик даврнинг сўнги куни эди. Қадрсизланишга президентнинг кўплаб мамлакатлардан импорт қилинадиган товарларга юқори божлар жорий этиш режаси сабаб бўлганди.

9 апрел куни эса у ўзининг Truth Social ижтимоий тармоғида "Айни пайт — акция сотиб олиш учун ажойиб вақт!!!" деб ёзди. Ўша куннинг ўзида Трамп аввал жорий қилинган божларнинг бир қисми бекор қилинишини эълон қилди, бу эса компаниялар акциялари нархининг кескин ўсишига олиб келди.

Ҳисоботларга кўра, 2026 йилда Трамп ўзининг шов-шувли қарорлари арафасида харидларни амалга оширишни давом эттирган. Январ ойида президент 1 миллион долларгача бўлган миқдорда Nvidia акцияларини харид қилган. Бир ҳафтадан сўнг эса унинг маъмурияти ушбу компаниянинг аввалроқ тақиқланган сунъий интеллект (АI) чипларини Хитойга экспорт қилишни маъқуллади.

Бундан аввал замонавий тарихда ҳеч бир президент Оқ уйдан туриб акциялар билан савдо қилмаган эди. Оқ уйнинг таъкидлашича, Трампнинг ҳисобрақамлари “ишончли бошқарув”га берилган бўлиб, ўтмишдошлари каби у ҳам битимларни шахсан назорат қилмайди.

Бироқ, Колумбия университети профессори Ричард Бриффонинг таъкидлашича, президент Трамп қандай активларга эга эканлигини жудаям яхши билади, унинг савдо амалиётлари устидан эса ҳеч қандай мустақил назорат мавжуд эмас.