Трампнинг соғлиғи “аъло даражада”, бироқ у озиши керак

Бу ҳақда Оқ уй томонидан эълон қилинган АҚШ президенти шифокори Шон Барбабелланинг хулосасида айтилади.

Тиббий хулосага кўра, Трамп “АҚШ Қуролли кучлари бош қўмондони ва давлат раҳбари вазифаларини тўлиқ бажаришга қодир”. Шифокор унинг юрак, ўпка, асаб тизими ва умумий жисмоний ҳолати яхши эканини, шунингдек, когнитив ва жисмоний кўрсаткичлари юқори даражада эканини қайд этган.

Шифокор президентга профилактика мақсадида жисмоний фаолликни ошириш ва вазн камайтиришни тавсия қилган. Маълумотларга кўра, Доналд Трамп сўнгги бир йилда 101,6 килограммдан 108 килограммгача семирган. Унинг бўйи 191 сантиметрни ташкил этади. Шифокор унга парҳезга риоя қилиш ва паст дозали аспирин қабул қилишни ҳам тавсия қилган.

Аввалроқ оммавий ахборот воситаларида Трампнинг қўлида кўринган кўкаришлар турли муҳокамаларга сабаб бўлган эди. Тиббий ҳисоботда айтилишича, кўрик давомида унинг қўл устки қисмида кўкариш ва енгил тирнаш ҳолати аниқланган. Бунга эҳтимолий сабаб сифатида тез-тез қўл сиқиш ва юрак-қон томир касалликларининг олдини олиш учун аспирин қабул қилиниши кўрсатилган.