Трампга АҚШнинг Эронга қарши потенциал зарбалари учун янги вариантлар тақдим этилади

Вашингтон маъмурияти расмийлари бу ҳафта АҚШ президенти Дональд Трампга Эронга қарши ҳарбий куч қўллаш эҳтимоли бўйича янги таклифларни тақдим этадилар.

Бу ҳақда Axios нашри хабар бермоқда.

Манбаларга кўра, Трамп шу ой бошида мамлакатдаги норозилик намойишларига жавобан Эрон ҳудудига зарбалар беришга буйруқ беришга яқин эди. "Бунинг ўрнига у қарорни кечиктирди ва шу билан бирга минтақага ҳарбий кучларни жойлаштирди", деб тушунтиради нашр. "Оқ уй расмийларининг айтишича, [Эрондаги] норозилик намойишлари асосан бостирилган бўлса-да, зарба бериш варианти ҳали ҳам кўриб чиқилмоқда", деб таъкидлайди нашр.

Шу билан бирга, АҚШ Марказий қўмондонлиги (CENTCOM) ядровий двигателли USS Abraham Lincoln авиаташувчиси бошчилигидаги авиаташувчи зарба бериш гуруҳи Ҳинд океанида эканлигини тасдиқлади. Хабарларга кўра, авиаташувчи ўзига юклатилган вазифаларни бажармоқда ва унинг денгизчилари режали техник хизмат кўрсатмоқда.

Трамп ҳали Эронга қарши зарбалар бериш эҳтимоли бўйича якуний қарор қабул қилмаганлиги ҳақида хабар берилган. "У бу ҳафта қўшимча маслаҳатлашувлар ўтказади ва унга ҳарбий куч ишлатиш бўйича қўшимча вариантлар тақдим этилади", дейилади хабарда.

Трамп аввалроқ Axios нашрига берган интервьюсида АҚШ Эрон яқинида сезиларли кучларни тўплаганини ва Теҳроннинг Вашингтон билан мулоқотга ва потенциал келишувларга тайёрлигига ишонч билдирганини айтган эди.

23 январь куни Трамп АҚШ Эронни кузатиб бораётганини ва минтақага сезиларли кучларни жойлаштираётганини эълон қилди. У "кўплаб кемалар бу йўналишда ҳаракатланмоқда, катта флот ҳаракатланмоқда" деб таъкидлади. Америка етакчиси илгари Ислом Республикасига қарши куч ишлатишни жиддий кўриб чиқаётгани ҳақида огоҳлантирган эди.

Ўз навбатида, Эрон Ташқи ишлар вазирлиги вакили Эсмаил Бағаи илгари Эрон ҳарбийлари Яқин Шарқдаги АҚШ кучларининг барча ҳаракатларини диққат билан кузатиб бораётганини ва мудофаа қобилиятини мустаҳкамлаш учун зарур чораларни кўраётганини айтган эди.