Трамп Зеленскийни тинчлик музокараларига тўсқинлик қилишда айблади

Трамп Зеленскийни танқид қилди: «У музокаралар олиб бориш учун бизга мос эмас».

АҚШ президенти Дональд Трамп Украина президенти Владимир Зеленскийни кескин танқид қилиб, уни Россия билан тинчлик келишувига эришишга тўсқинлик қилишда айблади. Newsmax консерватив телеканалига берган интервьюсида Трамп Зеленский билан музокара олиб бориш Россия президенти Владимир Путин билан музокара ўтказишдан кўра қийинроқ эканини айтди.

«У музокаралар олиб бориш учун бизга мос эмас», — деди Трамп. Шунингдек, у Зеленскийни омма олдида келишувга тайёрлигини билдирса-да, аслида музокара қилишни истамасликда айблади.

«Мен Зеленскийнинг катта мухлиси эмасман. Улар бу мамлакатни вайрон қилишди», — дея қўшимча қилди АҚШ президенти.

Трамп Украина Вашингтондан «миллиардлаб ва миллиардлаб доллар» ҳамда энг замонавий Америка қуролларини олганини эслатди. Унинг таъкидлашича, гўёки Путин ҳам, Зеленский ҳам урушни тугатишни истайди, бироқ Россия президенти билан келишувга эришиш осонроқ.

АҚШ президенти Украинанинг Россиядаги нефтни қайта ишлаш заводларига берган зарбаларини ҳам танқид қилди. У бу ҳаракатларни «шармандалик» деб атаб, Киевнинг бундай амалиётлари жаҳон бозорида нефть нархининг ошишига олиб келаётганини билдирди. Бироқ сўнгги пайтларда нефть нархининг кўтарилишига АҚШнинг Эронга қарши уруши ва Ҳурмуз бўғозининг блокланиши ҳам таъсир кўрсатмоқда.

Вашингтон ва Киев ўртасидаги келишмовчиликлар фонида Reuters агентлиги АҚШ расмийлари Украина ҳарбийлари фойдаланаётган Starshield сунъий йўлдош алоқа тизими фаолиятини чеклаш тўғрисида кўрсатма бергани ҳақида хабар қилди.

Агентлик манбаларига кўра, кўрсатма Оқ уйдан берилган. Бироқ қарорни айнан ким қабул қилгани ва унда Дональд Трампнинг шахсан иштироки бўлган-бўлмагани ҳозирча номаълум.