Трамп Хитойни Эронга қурол етказса, 50 фоизлик бож билан таҳдид қилди

АҚШ президенти Дональд Трамп агар Хитой Эронга қурол етказиб берса, Пекинга нисбатан янги савдо тарифлари жорий этилишини билдирди.

У бу ҳақда Fox Newsга берган интервьюсида маълум қилди.

«Агар биз уларнинг буни қилаётганини кўрсак, улар 50 фоизлик тариф олади», — деди Трамп.

Унинг айтишича, Хитой аввал можаро бошида Эронга чекланган ёрдам кўрсатган бўлиши мумкин, аммо ҳозир бундай ҳаракат қилаётганига шубҳа билан қарамоқда.

CNN эса АҚШ разведкаси Пекин яқин келажакда Теҳронга ҳаво мудофаа тизимларини юборишга тайёрланаётгани ҳақида огоҳлантирганини хабар қилди.

Шу билан бирга, Вашингтондаги Хитой элчихонаси бу айбловларни рад этиб, Пекин можарода ҳеч бир томонга ҳарбий ёрдам кўрсатмаётганини таъкидлади.