Трамп Венесуэла президенти билан музокаралар олиб борадими?

АҚШ президенти Дональд Трамп кескинлик кучайиб бораётган бир пайтда Венесуэла президенти Николас Мадуро билан музокара ўтказиши мумкинлигини айтди.

Америка етакчиси Флоридадан Вашингтонга жўнаб кетишдан олдин журналистларга маълум қилди.

"Мадуро билан музокаралар олиб боришимиз ва нима бўлишини кўришимиз мумкин. Улар гаплашмоқчи", деди у.

Трампнинг сўзларига кўра, гўёки Венесуэла президенти бошчилигидаги “Қуёшлар картели”ни (Cartel de los Soles) хорижий террорчи ташкилот сифатида белгилаш АҚШга Мадуронинг Венесуэла ичидаги активлари ва инфратузилмасини нишонга олиш имкониятини беради.

Шу билан бирга, президент унинг маъмурияти Венесуэла ичидаги эҳтимолий ҳарбий ҳаракатлар учун Конгресснинг рухсатига муҳтож эмаслигини таъкидлади.

"Биз уларнинг розилигига муҳтож эмасмиз. Лекин менимча, уларни хабардор қилиш яхши фикр", - деди у.

АҚШ Давлат котиби Марко Рубио аввалроқ АҚШнинг Cartel de los Solesни хорижий террорчилик ташкилоти рўйхатига киритиш ниятини эълон қилган эди.