Трамп ўғиллари араб давлатларига дронга қарши тизимларни сотмоқчими?

АҚШ президенти Дональд Трампнинг катта ўғиллари қўллаб-қувватлаётган Powerus компанияси Форс кўрфази давлатларига дронларни тутиб қолиш тизимларини сотишга уринаяпти.

Ҳозирда ушбу давлатлар Эрон томонидан амалга оширилаётган жавоб зарбаларига дуч келмоқда ва АҚШ ҳарбий ҳимоясига таянади.

Флоридада жойлашган компания ўтган ой Эрик Трамп ва Дональд Трамп кичик компанияга қўшилганини маълум қилди. Бу уларга компанияда катта улушга эга бўлиш имконини бериши мумкин. Маҳсулотлар тарғиботи АҚШ ва Исроил ҳужумларидан сўнг бошланган ва бир ойдан ортиқ давом этаётган Эрон билан уруш фонида кечмоқда.

Компания ҳаммуассиси Бретт Великовичнинг айтишича, Powerus вакиллари Яқин Шарқнинг бир нечта давлатларида дронга қарши тизимлар намойишини ўтказмоқда. Унинг сўзларига кўра, бу технологиялар ушбу давлатларга Эрон ҳужумларини қайтаришда ёрдам бериши мумкин. У аниқ қайси давлатлар билан музокара олиб борилаётганини очиқламаган.

Жорж Буш маъмурияти даврида Оқ уйнинг собиқ бош этика юристи Ричард Пейнтернинг таъкидлашича, минтақа давлатлари президент ўғилларидан маҳсулот сотиб олишга босим остида қолиши мумкин. Унинг фикрича, президент оиласи Конгресс розилигисиз бошланган урушдан катта даромад кўриши хавфи бор.

Powerus компанияси аввалроқ манфаатлар тўқнашуви мавжудлигини рад этган. Великовичнинг айтишича, компания АҚШга Хитой ва Россия ишлаб чиқарувчиларини қувиб етиш ва ортда қолдиришда ёрдам беришни мақсад қилган.

Унинг таъкидлашича, АҚШ ҳозир қуролланиш пойгасида иштирок этмоқда ва ишлаб чиқаришни тезлаштирмаса, ютқазиши мумкин. Шунингдек, у Америка саноатига киритилаётган инвестициялар сиёсий баҳслардан ташқари кўрилиши кераклигини айтган.

Президент ўғиллари сўнгги йилларда ўз бизнес манфаатларини кенгайтирмоқда. Улар иштирок этаётган компаниялар криптовалюта, прогноз бозорлари, ракета компонентлари ҳамда ноёб ер магнитлари ишлаб чиқариш каби турли соҳаларда фаолият юритмоқда.

Янги лойиҳа, шунингдек, Хитойдан импорт тақиқланганидан кейин АҚШда ҳарбий дрон ишлаб чиқаришни ривожлантириш учун ажратилган 1,1 миллиард долларлик Пентагон маблағларидан ҳам фойдаланишни режалаштирмоқда.