Трамп: "Россия Украина гуллаб-яшнашини хоҳлайди"

АҚШ президенти Дональд Трамп украиналик ҳамкасби Владимир Зеленский билан музокаралар якунлари бўйича ўтказилган матбуот анжуманида Россия Украинани қайта тиклашда иштирок этишга тайёрлигини маълум қилди.

Оқ уй матбуот хизмати ушбу тадбирни трансляция қилди.

"Россия Украина гуллаб-яшнашини хоҳлайди. У Украинани қайта тиклашда иштирок этишга тайёр", - деди Америка раҳбари.

Унинг сўзларига кўра, Россия президенти Владимир Путин билан телефон орқали суҳбат чоғида Запорожье атом электр станцияси масаласи муҳокама қилинган. Трампнинг қайд этишича, Россия раҳбари "унинг очиқлигини, жумладан, Украина учун ҳам очиқ бўлишини хоҳлайди".

"Путин менга Зеленский билан қўшма учрашувни кўришни хоҳлашини айтди ва бундай учрашув вақти келганида бўлиб ўтади”, — деди Трамп. Унинг қўшимча қилишича, келишувнинг қолган “кичик қисмини” ҳал қилиш “ҳаммаси яхши бўлса, бир неча ҳафта давом этади”.

Зеленский, ўз навбатида, музокарачилар ўртасида келишувни якунлаш учун яқин ҳафталарда янги учрашувлар ўтказилишини айтди. Шунингдек, у тинчлик режасининг айрим бандлари бўйича референдум ўтказишга рухсат берди.