Трамп Нью-Мексико штати номини «Янги Америка» деб ўзгартириш ғоясини қўллаб-қувватлади

АҚШ президенти Дональд Трамп Нью-Мексико штати номини «Янги Америка» деб ўзгартириш ғоясини қўллаб-қувватлади.

Трамп Truth Social ижтимоий тармоғида штат харитасини эълон қилиб, унда «Мексико» сўзини чизиб ташлаган. У ўз постида Нью-Мексико номини «Янги Америка» деб ўзгартириш таклифини билдирган.

«Кўпчилик тарихдаги энг кўп сохталаштирилган штатлардан бири бўлган Нью-Мексико номини “Янги Америка” деб ўзгартиришни таклиф қилди. Бу салоҳияти юқори штат аҳолиси учун анча обрўли ва жозибали эшитилиши мумкин», — деб ёзган Трамп.

Ушбу харита Оқ уйнинг расмий X аккаунтида ҳам тарқатилган.

The Hill нашри ёзишича, Трампнинг пости Нью-Мексико штатидаги демократ қонун чиқарувчилар томонидан танқид қилинган. Улар штатнинг тарихий номи ва маданий меросини сақлаш муҳимлигини таъкидлаган. Республикачи сенатор Майк Ли эса таклиф этилган янги номни мақтаб, уни «жуда жозибали» деб атаган.

Шу билан бирга, Нью-Мексико номини расман ўзгартириш ҳақидаги хабарлар аввал ижтимоий тармоқдаги сатирик аккаунтда пайдо бўлган. Snopes бу маълумотни рад этиб, штат номини ўзгартириш бўйича ҳеч қандай фармон ёки бошқа расмий ҳужжат мавжуд эмаслигини маълум қилган.

Шу сабабли Трампнинг пости Нью-Мексико штати расмий равишда «Янги Америка» деб қайта номланганини англатмайди.