Трамп Маск АҚШ ҳукумати учун қанча вақт ишлашини айтди

АҚШ ҳукумати самарадорлигини ошириш департаменти (DOGE) ишига масъул бўлган Илон Маск Вашингтон маъмуриятида камида яна бир неча ой ишлайди. Бу ҳақда пайшанба куни журналистларга АҚШ президенти Доналд Трамп маълум қилди.

"Илон маълум муддатга қолади. Кейин эса у ўз бизнесига доимий асосда қайтишни хоҳлайди. Аммо у ажойиб иш қилди," - дея таъкидлади Америка етакчиси. "Менимча, бир неча ой," - деди у Маскнинг "DOGE" ишини яна қанча вақт назорат қилиши ҳақидаги саволга жавоб берар экан. - Қанча хоҳласа, шунча. Менга ақлли одамлар ёқади, - дея жавобини давом эттирди Трамп. - Мен Илоннинг иложи борича кўпроқ қолишини истардим. Лекин шундай вақт келадики, у кетишга мажбур бўлади." Трампнинг сўзларига кўра, шундан кейин DOGE’да бошқа раҳбарият бўлади, бироқ идора ўз ишини давом эттиради.

Трампнинг ишонтиришича, у Маск ва DOGE’нинг АҚШ ҳукуматидаги фирибгарлик, суиистеъмолчилик ва талон-тарожликларни аниқлаш борасидаги ишларини юқори баҳолайди. Америка етакчиси Флорида штатига учаётган самолёт бортида журналистларнинг саволларига жавоб берган. Трамп келажакда Маскни бошқа лавозимга тайинлашини тан олди. - Шундай қилардим. У ажойиб. Аммо унинг бошқариши керак бўлган компаниялари ҳам бор," - деди Америка етакчиси.

2 апрель куни Американинг Politico газетаси манбаларга таяниб хабар беришича, Трамп яқин ҳафталарда Маск ўйнаётган сиёсий роль камайиши ҳақида яқинларини огоҳлантирган. Нашр манбаларига кўра, Маск асосан бизнес билан шуғулланади ва сиёсат нуқтаи назаридан "ёрдамчи роль ўйнайди," эҳтимол, Трампнинг "норасмий маслаҳатчиси ролини сақлаб қолади."