Трамп: "Исроил араб давлати ривожланишига тўсқинлик қилмаслик учун Суриянинг янги расмийлари билан мулоқотни давом эттириши керак"

АҚШ президенти Дональд Трамп Исроилни араб давлати ривожланишига тўсқинлик қилмаслик учун Суриянинг янги расмийлари билан мулоқотни давом эттиришга чақирди.

Бу ҳақда Трамп Truth Social нашрида ёзди.

"Исроилнинг Сурия билан кучли ва ҳалол мулоқотни давом эттириши ва Суриянинг гуллаб-яшнаган давлатга айланишига ҳеч нарса тўсқинлик қилмаслиги жуда муҳим", деб таъкидлади Трамп.

Трамп Вашингтон маъмурияти Сурияда эришилган натижалардан мамнун эканлигини ва ҳукумат ўз мақсадларини амалга оширишда давом этиши учун барча саъй-ҳаракатларини амалга ошираётганини таъкидлади.

"Биз Сурия ҳукумати ўз режаларини амалга оширишда давом этиши учун барча имкониятларни ишга соляпмиз, бу ҳақиқий ва фаровон мамлакат қуриш учун зарурдир. Уларга катта ёрдам берган омиллардан бири менинг ўта қаттиқ ва оғриқли санксияларни тўхтатиб қўйишим бўлди – ўйлайманки, буни Сурия, унинг раҳбарияти ва халқи чин дилдан қадрлашди!" деди у.

Америка раҳбари, шунингдек, Суриянинг янги президенти Аҳмад ал-Шара Сурия ва Исроил ўртасидаги ижобий ўзгаришлар ҳамда узоқ ва фаровон муносабатларни таъминлаш учун астойдил ҳаракат қилаётганини таъкидлади. Трампнинг сўзларига кўра, бу Яқин Шарқда тинчликка эришишга ҳисса қўшадиган тарихий имкониятдир.