Трамп Ғазо бўйича келишувни талаб қилмоқда, Нетаньяху қарши турибди

АҚШ президенти Дональд Трамп Ғазодаги урушни тўхтатиш бўйича келишувни ҳафта охиригача тузиш бўйича музокара воситачиларига кўрсатма берди. Бу ҳақда The Times of Israel Қатардаги музокараларда иштирок этаётган араб дипломатига таяниб хабар берди.

Унга кўра, бу талаб Исроил ва ҲАМАСга йўналтирилган бўлиб, Трамп ҳар икки томонни ўз умидларини оқлашга чақирган. Охирги икки кунда Дохада муайян илгарилашга эришилган, айниқса гуманитар ёрдам масаласида. Халқаро танқидларга сабаб бўлган Ғазо Гуманитар Жамғармаси (GHF) фаолияти чекланиши ёки бутунлай тўхтатилиши мумкин.

ҲАМАС БМТ ва бошқа халқаро ташкилотлар орқали кўпроқ ёрдам олиб кирилишига имконият яратилишини талаб қилмоқда. Бироқ Исроил бу ташкилотларнинг Ғазога киришини чеклаб қўйган.

Шунингдек, 60 кунлик вақтинчалик ўт очишни тўхтатиш доирасида Исроил қўшинларининг қисман чиқиши муҳокама қилинмоқда. Исроил делегацияси Қатарга эҳтимолий чиқиш ҳудудларини кўрсатувчи харита тақдим этган. ҲАМАС эса 2 мартда тузилган, аммо Исроил бузган келишувдан олдинги позицияларга қайтишни талаб қилмоқда, лекин муайян даражада мурувват ҳам кўрсатмоқда.

Асосий зиддият эса — Исроил келишувни вақтинчалик деб кўраётган бир пайтда, ҲАМАС тўлиқ урушни тугатишни талаб қилмоқда.

Бу масала душанба куни Трамп ва Исроил Бош вазири Биньямин Нетаньяху ўртасида кечки овқат пайти муҳокама қилинади. Исроилнинг Канал 12 телеканалига кўра, Нетаньяху Трампга Исроилнинг қуйидаги шартларидан чекинмаслигини билдиришни режалаштирмоқда:

– Ғазони тўлиқ демилитаризация қилиш,
– ҲАМАСни йўқ қилиш,
– ҲАМАС раҳбарларини эксклавдан чиқариб юбориш.