Трамп Эроннинг Миноб шаҳридаги қизлар мактабига берилган зарбада Теҳронни айблади

АҚШ президенти Доналд Трамп Air Force One самолёти бортида журналистларнинг саволларига жавобан Минобдаги қизлар мактабига йўлланган зарба учун Эрон расмийлари жавобгар эканини айтди. Бу айбловни унинг ёнида бўлган Пентагон раҳбари Пит Ҳегсет ҳам тасдиқлади.

"Мен кўрган маълумотларга кўра, бу ишни эронликлар қилган. Биласизки, уларнинг ўқ-дорилари жуда ноаниқ. Уларда аниқлик умуман йўқ", – деди Трамп.

Шундан кейин журналист Пентагон раҳбари Пит Ҳегсетга ҳам шу савол билан мурожаат қилди. У эса шундай жавоб қайтарди: "Биз, албатта, текширув олиб боряпмиз, аммо тинч аҳолини нишонга оладиган ягона томон бу – Эрон".

Эрон жанубида жойлашган Миноб шаҳридаги қизлар мактаби Яқин Шарқдаги урушнинг илк кунида, 28 феврал куни, ҳужумга учраганди. CNN маълумотига кўра, зарба оқибатида 180 киши ҳалок бўлган.

Теҳрон Минобга зарбада Вашингтонни айблаган. АҚШ нашрлари, жумладан The New York Times, Reuters ва CNN ҳам америкалик ҳарбийлар ушбу зарбага алоқадор бўлиши мумкинлигини хабар қилган. Хусусан, The New York Times АҚШ ҳарбий-ҳаво кучларининг нишони Минобдаги Ислом инқилоби муҳофизлари корпуси базаси бўлгани ва мактабга хатолик билан зарба берилган бўлиши мумкинлиги ҳақида ёзганди.