АҚШ президенти Теҳронга қарши ҳарбий амалиёт ўтказилганига қарамай, "янги урушлар бошламаслик" ҳақидаги сайловолди ваъдасини бузилган деб ҳисобламаслигини маълум қилди.
NBC News телеканалига берган интервьюсида журналист Кристен Уэлкер янги урушлардан воз кечиш Трампнинг 2015 йилдан бери берган асосий ваъдаларидан бири бўлганини эслатиб, у ушбу ваъдасини буздими-йўқми деб сўради. Бунга жавобан президент Эронга қарши ҳаракатлар Теҳроннинг ядровий қуролга эга бўлишига йўл қўймаслик учун зарур бўлганини таъкидлади.
"Мен ўта қудратли ва жуда хавфли давлатнинг ядровий қуролга эга бўлишини тўхтатишим керак эди. Мен дунёга ва мамлакатимизга хизмат кўрсатмоқдаман", — деди у.
Янги урушлар бошламаслик ваъдаси ҳақидаги такрорий саволга Трамп: "Биринчи навбатда, мен урушлар умуман бўлмаслигига кафолат бермаганман", — дея жавоб қайтарди.
Ўзаро баҳс пайтида Трамп Уэлкерни "катта либерал" деб ҳам атади. У ўзини "шунчаки журналист" эканини айтиб эътироз билдирганида, президент америкаликлар унинг қарорларига ишонишини ва Эрон таҳдидини узил-кесил йўқ қилмоқчи эканлигини билдирди.
"Мен буни ёки музокаралар орқали амалга ошираман — биз келишувга жуда яқинмиз, ёки очиғини айтганда, уларга ҳужум қилиб кулини кўкка совураман. Бу ҳатто осонроқ йўл", — деди Трамп. Шу билан бирга, у ҳозирги зиддиятни "чексиз уруш" деб ҳисобламаслигини қўшимча қилди.
2026 йил ёзда Марказий Осиё мамлакатларида аномал даражада кучли ёғингарчиликлар кузатилиши мумкин
Миллион россиялик мамлакатни тарк этди
Ўзбекистон – Нидерландия ўртоқлик ўйини Нью-Йоркда бўлиб ўтади
