Трамп АҚШнинг кейинги президентлик сайловлари ҳақида кутилмаган фикр билдирди

АҚШ президенти Доналд Трамп вице-президент Жей Ди Вэнснинг 2028 йилги президентлик сайловларида иштирок этиши ҳали аниқ эмаслигини билдирди.

Оқ уйда журналистлар билан суҳбатлашган Трамп Вэнс билан турли масалаларни муҳокама қилиб келаётганини, аммо келгуси сайловларда кимлар номзод бўлиши ҳозирча номаълумлигини таъкидлади.

"Биз у билан кўп масалалар ҳақида гаплашамиз. Кейин нима бўлишини кўрамиз. Сайловда жуда кўп номзод қатнашиши мумкин. Балки Вэнс ҳам ўз номзодини қўймас. Ҳозирча ким иштирок этишини билмайман", — деди АҚШ раҳбари.

Аввалроқ Вэнс 2028 йилги президентлик сайловларида қатнашиш имкониятини истисно этмаган, бироқ бу борада якуний қарорга келмаганини билдирган эди.

Шунингдек, вице-президент ўз номзодини илгари сурган тақдирда Трампнинг қўллаб-қувватлашига умид қилишини айтган.