Трамп АҚШ ва Канада ўртасида нефть ташиш учун янги рухсатномаларни тасдиқлади

АҚШ президенти Дональд Трамп Қўшма Штатлар ва Канада ўртасида нефть ва нефть маҳсулотларини ташиш билан боғлиқ бир нечта рухсатномаларни имзолади.

Бу ҳақда Оқ уй тегишли ҳужжатларни эълон қилди.

Маълумотларга кўра, рухсатномалардан бири Шимолий Дакота штатининг Бурке округида қувур линияси инфратузилмасини қуриш, улаш, ишлатиш ва техник хизмат кўрсатиш учун Bakken Pipeline Company LPга берилган.

Бундан ташқари, Bakken Pipeline Company LP шу округда мавжуд қувур линияси иншоотларини ишлатиш ва техник хизмат кўрсатиш учун алоҳида рухсатнома олди.

Enbridge Energy субъектларига қўшимча иккита рухсатнома берилди. Улар Мичиган штатининг Сент-Клэр округи ва Шимолий Дакота штатининг Пембина округидаги мавжуд қувур линияси иншоотларини ишлатиш ва техник хизмат кўрсатиш билан боғлиқ.

Ушбу рухсатномалар АҚШ-Канада чегараси орқали хом нефть ва нефть маҳсулотларини ташишни осонлаштиришга қаратилган.