Нидерландиянинг Вейк-ан-Зее шаҳрида шахмат бўйича 2026 йилги Тата Steel турнири давом этмоқда. Ушбу нуфузли мусобақанинг умумий соврин жамғармаси 1,2 миллион АҚШ долларидан ортиқни ташкил этади.
Мусобақанинг Masters гуруҳи иккинчи кун баҳслари доирасида ўзбекистонлик гроссмейстер Нодирбек Абдусатторов оқ доналарда ҳиндистонлик шахматчи Прагнанандҳа Рамешбабуни мағлуб этди.
Мазкур натижадан сўнг Абдусатторов 1,5 очко жамғариб, қўшимча кўрсаткичларга кўра турнир жадвалида 2-ўринга кўтарилди. Абдусатторов 1-турда қора доналарда дунёнинг энг ёш тўртинчи гроссмейстери, туркиялик 14 ёшли Яғис Каан Эрдоғмус билан дуранг ўйнаган.
Биринчи ўриндаги АҚШ вакили Ҳанс Ниманн ва 3-поғонани эгаллаб турган Аржун Эригаиси ҳисобида ҳам 1,5 очко мавжуд.
Жаҳон кубоги ғолиби Жавоҳир Синдоров эса нидерландиялик Аниш Гири билан дуранг эвазига 1 очко билан 11-ўринда бормоқда. 4–12-ўриндаги барча шахматчилар 1 очкодан жамғарган. Синдоров 1-турда амалдаги Жаҳон чемпиони, ҳиндистонлик Гукеш Доммаражуга қарши оқ доналарда дуранг қайд этган эди.
Ўзбекистоннинг биринчи рақамли шахматчиси Нодирбек Абдусатторов FIDE онлайн рейтингида 2755 очко билан 7-ўринга кўтарилди.
Мусобақа 13 та турдан иборат бўлиб, 21 ёшли Абдусатторов 2025 йилги Tata Steel Chess мусобақасида 3-ўринни эгаллаган.
Маълумот учун, Нодирбек Абдусатторов ва Жавоҳир Синдоров 2026 йил 13–15 февраль кунлари Германиянинг Вайзенхаус шаҳрида бўлиб ўтадиган FIDE Freestyle Chess Жаҳон чемпионатида иштирок этади. Мусобақа Халқаро шахмат федерацияси (FIDE) ва Freestyle Chess Operations ташкилоти ҳамкорлигида ташкил этилади.
Клопп «Реал» юлдузини жамоадан ҳайдайди
АҚШ ЖЧ-2026'да иштирок этадиган 4 та давлат фуқароларига ўз ҳудудига киришни тақиқлади
Абдуқодир Ҳусановга жиддий рақобатчи келмоқда
