Сурия хавфсизлик кучлари Ливан чегарасидаги ҳудудни назоратга олди

Суриянинг янги ҳукумати қўл остидаги хавфсизлик кучлари Ливан билан чегарадаги Хомс шаҳридан жанубда жойлашган Ҳауш ал-Саййид Али аҳоли пункти ҳудудини назоратга олди.

Бу ҳақда армия вакилларига таяниб, Al Hadath телеканали хабар бермоқда.

Маълумотларга кўра, улар бу аҳоли пунктидан Сурия томонига кўра, чегара яқинидаги турар-жойларни ўққа тутаётган “Ҳизбуллоҳ” жангариларини ҳайдаб чиқарган. Сурия хавфсизлик расмийларининг айтишича, улар Ливан билан чегарани назорат қилиш учун кенг қамровли режа ишлаб чиққан.

Эслатиб ўтамиз, Сурия-Ливан чегарасида вазиятнинг кескинлашуви 16 март куни бошланган эди. Al Nahar газетасининг ёзишича, Сурия махсус кучлари бўлинмаси Ливан ҳудудига адашиб кирган ва у ерда маҳаллий қабила жангарилари томонидан ҳужумга учраган, натижада Сурия элита кучларининг уч нафар жангчиси ҳалок бўлган. Сурия Ички ишлар вазирлигидаги манба воқеанинг бошқача версиясини тақдим этиб, айбни якшанба куни Сурия чегарасини кесиб ўтиб, хавфсизлик кучларининг уч зобитини ўғирлаб кетган ва ўлдирган Ҳизбуллоҳ аъзоларига юклаган. Ҳизбуллоҳ матбуот хизмати ўз баёнотида Ливан-Сурия чегарасида содир бўлаётган воқеаларга алоқадорлигини рад этди.

Al Hadath телеканалига кўра, чегарадаги отишмалар натижасида Сурия кучлари жами олти жангчисини йўқотган. Ливан ҳудудида Сурия томонидан ўққа тутилиши натижасида бир бола ҳалок бўлди ва яна тўрт нафар тинч аҳоли яраланди.