Судан армияси президент саройини эгаллади

Судан армияси президент саройини эгаллади. Бу ҳақда Reuters хабар берди.

Агентлик манбаларига кўра, Судан армияси пойтахт Хартумдаги президент саройи устидан назорат ўрнатган. Ҳарбийлар сарой атрофини кўздан кечириб, армияга қарши курашаётган Тезкор реакция кучлари (RSF) аъзоларини қидирмоқда.

"Қўшинларимиз душман жангчиларини ва уларнинг техникасини тўлиқ йўқ қилди. Шунингдек, катта миқдордаги ҳарбий техника ва қуролни қўлга киритди", дея армия вакилининг сўзларини иқтибос келтирмоқда АFP.

2019 йилда Судан президенти Умар ал-Башир ҳарбийлар томонидан ағдарилган, аммо улар ҳокимиятни фуқаролик ҳукуматига топшириш ваъдасини бажармаганди. 2023 йил баҳорида Тезкор реакция кучлари (RSF) президент саройини ва пойтахтнинг катта қисмини эгаллаб, параллел ҳукумат тузган эди.

Шундан бери Судан армияси ва RSF ўртасидаги кураш тўхтамаган. Жанглар натижасида ўн минглаб одам ҳалок бўлган, миллионлаб инсонлар ўз уйларини тарк этишга мажбур бўлган. БМТ Судандаги вазиятни “дунёдаги энг йирик гуманитар инқироз” деб баҳоламоқда.