Си Жинпин Ҳиндистон бош вазири Нарендра Модига мактуб йўллади

Си Жинпин АҚШ томонидан янги божлар жорий этилгач, Ҳиндистон бош вазири Нарендра Модига мактуб йўллади.

Бу ҳақда Bloomberg хабар бермоқда.

Агентлик манбаларига кўра, Хитой етакчиси Пекин ва Нью-Деҳли ўртасидаги муносабатларни яхшилаш имкониятларини ўрганишга ҳаракат қилмоқда. Ҳиндистон ва Хитой ўртасидаги яқинлашув жараёни июн ойидаёқ бошланган эди.

Ҳиндистон расмийсининг аниқлик киритишича, июнь ойида Ню-Деҳли Пекин билан яқинлашиш бўйича ҳаракатларни бошлаган. The Times of India хабарига кўра, август ойида томонлар ўн йиллардан бери давом этаётган чегара келишмовчиликларини ҳал қилиш бўйича музокараларни фаоллаштиришга келишиб олганлар.

Хитой ташқи ишлар вазири Ван Ининг 18-20 август кунлари Ҳиндистон пойтахтига ташрифи муносабатларни нормаллаштиришнинг асосий нуқтаси бўлди. У ерда томонлар мамлакатлар ўртасидаги тўғридан-тўғри авиақатновларни тиклашни тезлаштириш ва ҳаво қатнови бўйича янги келишув устидаги ишларни якунлаш ҳақида келишиб олдилар.

Бундан ташқари, Пекин 2026 йилда Ҳиндистонда БРИКС саммитини ўтказишни қўллаб-қувватлади, Ню-Деҳли эса бунга жавобан Хитойга 2027 йилда бирлашма саммитини ташкил этишда кўмаклашишга тайёрлигини билдирди.