Си АҚШга ташриф чоғида нега қўшимча дам олиш вақти ажратишни сўраган?

Си Цзиньпинга Трамп билан саммит вақтида беш соатлик дам олиш танаффусига чиқаришган — WSJ

Хитой томони АҚШга давлат ташрифи чоғида ХХР раиси Си Цзиньпинга қўшимча дам олиш вақти ажратишни сўраган. Натижада икки кунлик дастурда расмий тадбирларсиз қарийб беш соатлик танаффус пайдо бўлган. Бу ҳақда The Wall Street Journal манбаларга таяниб хабар берди.

Хитой делегациясининг талабларидан бири Си Цзиньпин учун Оқ уйнинг Ғарбий қанотида алоҳида дам олиш хонаси ажратиш бўлган. У ерда фақат унинг рафиқаси Пэн Лиюань бўлишига рухсат берилган. АҚШ Миллий хавфсизлик кенгашининг собиқ ходими Деннис Уайлдер бундай келишувни мисли кўрилмаган ҳолат деб атаган.

Си Цзиньпиннинг АҚШга ташрифидан олдин унинг делегацияси 24 сентябрга режалаштирилган Дональд Трамп билан ишчи тушликдан воз кечган. Шунингдек, Хитой раҳбари мамлакатга келганидан кейин кечқурун расмий тадбирлар ўтказилмаган.

25 сентябрь куни Си Цзиньпин Миллий архивда бор-йўғи 10 дақиқа бўлган. Бу Америка томони режалаштирган вақтдан анча қисқа бўлган.

WSJ маълумотларига кўра, ташриф дастури Си Цзиньпиннинг қанча вақт тик тургани, қанча масофа юра олиши ва қачон дам олиши кераклиги ҳисобга олинган ҳолда тузилган. 24 сентябрь куни икки томонлама музокаралар тушга яқин бошланиб, куннинг иккинчи ярми бошида якунланган. Шундан сўнг Си Оқ уйни тарк этиб, фақат давлат кечки зиёфати учун қайта келган.

Си Цзиньпиннинг АҚШга ташрифи Хитой раҳбарининг 11 йил ичидаги биринчи давлат ташрифи бўлди. Учрашув якунида Трамп музокараларни «10 баллдан 12 балл» деб баҳолаган бўлса, Си Цзиньпин учрашувни «самимий ва чуқур» деб атаган.