Швеция Украинага деярли 1,5 миллиард евролик янги ҳарбий ёрдам юборади

Бу ҳақда қироллик мудофаа вазири Пол Йонсон маълум қилди.

"Бизнинг мақсадимиз – Украинани музокараларда кучли позицияга эга бўлиши учун максимал даражада қўллаб-қувватлаш", – дея изоҳ берди Йонсон.

16 миллиард швед кронаси (тахминан 1,48 миллиард евро) миқдоридаги ёрдам пакети Стокголм томонидан Киевга ажратилган энг йирик маблағ ҳисобланади. Йонсоннинг сўзларига кўра, ушбу пакетнинг асосий қисми, 9 миллиард крона, янги ҳарбий техника сотиб олишга йўналтирилади, яна 5 миллиард крона эса Украинанинг мудофаа саноатини молиялаштиришга сарфланади.

Шу тариқа, Россиянинг кенг кўламли босқини бошланганидан бери Швециянинг Украинага кўрсатган ҳарбий ёрдами умумий ҳисобда 80 миллиард кронани (тахминан 7,4 миллиард евро) ташкил этади.

Бундан ташқари Швеция мудофаа вазири бошқа Европа давлатларини ҳам Украинага кўпроқ ёрдам беришга чақирди.

"Кўпроқ мамлакатлар янада кучлироқ ҳаракат қилиши керак. Европа Иттифоқи иқтисодиёти Россия иқтисодиётидан саккиз баравар йирик, шунинг учун сиёсий ирода мавжуд бўлса, катта ёрдам кўрсатиш мумкин. Муаммо шундаки, Европа мудофаа саноати тинчлик даврига мослаштирилган", – дея Йонсоннинг сўзларини келтиради Reuters агентлиги.