Sevimli ТV кино таҳририяти мудири Лола Шоимова uza.uz сайтига турк сериаллари бўйича бўлаётган муносабат юзасидан шундай мазмунда фикр билдиради:
Шум бола фильмида эрига хиёнат қилган аёл, шум болани ўғирликка даъват қилган ўғрибоши ҳақидаги саҳналар бор. Лекин нега бу асарни, асар асосида ишланган кинони ҳеч ким қораламайди ёки Келинлар қўзғолони даги қайнонасига қарши чиққан Нигорани ҳеч ким танқид қилмайди?
Киношунос эмасман, аммо оддий томошабин сифатида шундай жавоб берган бўлардим. Чунки Шум бола фильми саҳнасидаги бузуқ аёл ёки ўғрибоши кинонинг бош қаҳрамони эмас. Балки кичик эпизод. Яъни бузуқ аёл ёки ўғрибоши асар қаҳрамонининг отаси ёки онаси эмас.
Шум боланинг онаси хокисор, оддий ўзбек аёли. Ўғлининг қулоғидан чўзиб келган қўшнисига белини қўлига тираб шаллақилик қилмайди. Фильм қаҳрамони шум бола Қоравой ўғрибоши ўғриликка даъват қилса-да, ейишга нони, кийишга кийими бўлмаса ҳам, бойлик орттириш мақсадида ўғрибошининг ортидан кетмайди.
Ўғрибошидан қутулиш мақсадида ҳатто дўсти Омонни зўрға пул йиғиб олган қўзисидан ҳам воз кечишга ундайди. Қоравой турли шумликларни ўйлаб топади ва бу баъзи шумликлари билан жамиятдаги камчиликларни очиб беради.
Шум бола қийин шароитда, шу характери билан ҳам инсонийлик фазилатларини сақлаб қолади. Ўғирлик қилмайди, эрига хиёнат қилган бузуқ аёлдан нафратини яширмайди, бойнинг қизини кузатиб ўтиргани учун бой уни қаттиқ жазоласа-да қизини бадном қилиш ҳақида ўйламайди.
Шум боланинг бўй етган синглиси ҳалиям қўғирчоқ ўйнайди. Бошига тушган мусибатларга қарамай, бирорта йигит билан қочиб кетмайди.
Келинлар қўзғолони киносига келсак, етти келиндан биттаси ўз ҳақ-ҳуқуқини талаб қилиб чиқади. Буни табиий ҳол деб қабул қилиш керак. У ахлоқсизлик қилмади, у ҳатто ҳақиқатни қайнонасининг юзига айта олди, орқасидан гапирмади.
Кинонинг бош ғояси ана шу келин орқали очиб берилган. Яъни ака-укалар ва овсинларнинг бир хонадонда яшашининг яхши жиҳатлари-ю камчиликлари назарда тутилган. Қолган олти келиннинг ичида ҳам бирортаси ахлоқсиз эмас. Ҳатто қайнонаси биринчи турмушидан ажраган келинига жўнатилган пулдан воз кечишини маслаҳат беради.
Нега? Балки ҳар сафар неварасининг отасидан келадиган алимент туфайли келини бир бора биринчи эрини ёдга олишини истамагандир. Келинлари-ю ўғилларидан тийин-тийинигача маошини санаб олган қайнона мана шу ерда мардлик қилади.
Бу ёмонлик ва яхшиликнинг курашуви аслида. Келин боласига пул жўнатаётган биринчи эрига кетгиси келиб қолиши мумкин эди-ку, сериаллардагидек. Турк сериалида ҳатто опа сингиллар бир-бирининг эрининг суратига термилиб ўтирганда, овсинларнинг бирортаси мулла акасига кўз сузмади (узр, тасаввур қилишга ҳам уялади киши). Ёки Фармонбибининг ўғилларидан бирортаси бошқа аёлларни севиб (масалан, дўстларининг) қолмади. Аксинча, хотинининг қадрига етмаган бир ўғил она томонидан қаттиқ жазоланди.
Йиллар оша ҳамон севиб томоша қилинаётган ва ҳамон севимли бўлиб яшаб келаётган санъат дурдоналарига айланган Шум бола , Келинлар қўзғолони каби фильмларни бошқа кинолар билан солиштириш ёки ғоявий томондан жуда бўш ишланган БАЪЗИ сериаллар баҳридан ўтмаслик учун қурбон қилиниши мантиққа тўғри келадими?!
Manba: uza.uz
