Сербия парламенти бош вазир Вучевичнинг истеъфосини тасдиқлади

Сербия парламенти бош вазир Вучевичнинг истеъфосини тасдиқлади.

Энди муддатидан олдин сайловларнинг олдини олиш учун 30 кун ичида, яъни 18 апрел тун ярмигача янги бош вазир ва ҳукумат тайинланиши керак.

Сербия Халқ Скупшинаси (парламент) спикери Ана Брнабичнинг маълум қилишича, кейинги қадамлар мамлакат президенти Александр Вучичнинг масъулиятига киради. Президент бош вазир лавозимига янги номзодни таклиф этиши керак.

Вучевич 2025 йил январ ойи охирида истеъфога чиқишини эълон қилган эди. Бу қарор Сербиянинг Нови-Сад шаҳрида ҳукмрон Сербия Прогрессив партияси (SNS) билан боғлиқ гуруҳнинг фаол-талабларга ҳужум қилиши ортидан қабул қилинди.

Ушбу шаҳарда 2024 йил ноябр ойида вокзалдаги бетон конструкциянинг қулаши натижасида 15 киши ҳалок бўлганди. Нови-Саддаги фожиа сабабли бир неча ойдан буён Сербия бўйлаб оммавий норозилик намойишлари давом этмоқда.

Баъзи кузатувчиларнинг фикрига кўра, парламентнинг бош вазир истеъфосини тасдиқлаш учун етти ҳафта вақт талаб қилгани президент Вучичнинг қарор қабул қилишни кечиктиришга бўлган ҳаракати сифатида баҳоланмоқда.