Сентябр ойида бизни қандай об-ҳаво кутмоқда?

«Ўзгидромет» хабарига кўра, сентябрь ойининг биринчи ўн кунлигида қулай ҳарорат фонида асосан кам булутли ва қуруқ об-ҳаво бўлиши кутилмоқда.

Кечалари ва эрта тонгда +15...+20 даража бўлган ҳароратда тетиклантирувчи салқинлик сезилади, кундуз кунлари эса қуёш нурлари ҳавони +35 даражагача, айрим кунларда +37 даражагача иситади.

Кейинчалик сентябрь ойининг охиригача ҳарорат кечалари +15...+20 дан +8...+13 даражагача, кундуз кунлари +30...+35 дан +20...+25 даражагача ўзгариб туриши кутилмоқда.

Сентябрь ойида ўртача ойлик ҳарорат меъёр атрофида, баъзи жойларда меъёрдан 1-1,5 даражага юқори бўлиши кутилмоқда.

Ойнинг иккинчи ярмида айрим кунларда (1-2 кун) қисқа муддатли ёмғир ёғиши мумкин.

«Ўзгидромет» хабарига кўра, энг совуқ (меъёрдан 2-3,5 даражага паст) сентябрь ойлари 1930 ва 1931 йилларда, сўнгги ўн йилликда эса 1992 ва 1994 йилларда қайд этилган. Энг илиқ (меъёрдан 1,5-3,5 даражага юқори) сентябрь ойлари эса 2013, 2016, 2021, 2022 йилларда, яъни ушбу асрда кузатилган бўлиб, бу глобал исиш тенденциясига мос келади.

Таъкидланишича, Ўзбекистонда сентябрь - йилнинг энг қуруқ ойлардан биридир. Сентябрь ойида ёмғир камдан-кам (ойига 1-3 марта) ёғади. Шундай йиллар кузатилганки, бутун Ўзбекистонда ёки ҳудуднинг катта қисмида сентябрь ойида умуман ёмғир ёғмаган. Бу асрда бундай аномал қуруқ сентябрь ойлари 2007 ва 2021 ва 2022 йилларда қайд этилган.