Грузия Европа Иттифоқи билан муносабатларда муҳим қарор остонасига келиб қолди. Брюссель Тбилисидан Россияга қарши санкцияларга қўшилишни талаб қилмоқда, акс ҳолда грузияликлар учун визасиз саёҳат тартиби қайта кўриб чиқилиши мумкин.
Шалва Папуашвилининг таъкидлашича, бундай талабларни бажариш мамлакат иқтисодиёти учун жиддий оқибатларга олиб келиши мумкин.
“Грузиядан ўз мамлакатини иқтисодий жиҳатдан заифлаштириш талаб қилинмоқда. Визалар эса сиёсий босим воситасига айлантирилмоқда”, деди парламент раиси.
Ираклий Кобахидзе ҳам Ғарб давлатлари бир неча йилдан буён Тбилисидан Россияга қарши чекловларга қўшилишни талаб қилиб келаётганини айтди.
Айни пайтда Россия Грузиянинг энг йирик савдо ҳамкорларидан бири ҳисобланади. Расмий маълумотларга кўра, икки давлат ўртасидаги товар айирбошлаш ҳажми ўтган йили қарийб 2,7 миллиард долларга етган. Грузия Россияга асосан минерал сув, мева-сабзавот ва ёнғоқ экспорт қилса, Россиядан нефть маҳсулотлари, газ, буғдой ва бошқа маҳсулотлар импорт қилинади.
Айрим экспертлар фикрича, Россияга қарши санкцияларга қўшилиш Грузия учун муҳим бозорнинг қисқаришига олиб келиши мумкин. Шу билан бирга, Европа Иттифоқи билан муносабатларнинг ёмонлашиши ҳам мамлакатнинг евроинтеграция режаларига салбий таъсир кўрсатиши мумкин.
Сўнгги йилларда Брюссель ва Тбилиси ўртасидаги муносабатлар мамлакатдаги сиёсий жараёнлар, мухолифатга муносабат ва демократик ислоҳотлар масалалари туфайли мураккаблашган.
Шу тариқа, Грузия ҳозир иқтисодий манфаатлар ва Европа билан яқинлашув ўртасидаги мураккаб танловга дуч келмоқда. Бу қарор мамлакатнинг ташқи сиёсати ва иқтисодий келажагига сезиларли таъсир кўрсатиши мумкин.
Миллион россиялик мамлакатни тарк этди
47°C иссиқликда тонг ҳам, тун ҳам йўқ: Ҳиндистоннинг энг иссиқ ҳудудида бир кун
Жалолиддин Машарипов терма жамоа қайдномасидан чиқарилмоқда
