2024-йил 26-июль куни Самарқанд вилоятининг Тайлоқ туманида хонанда Зебойи Жаҳон (Зебинисо Носирова) ўлдирилди. Бу ҳақда “Millar” дастурида, “Milliy TV” телеканалида хабар берилди.
33 ёшли аёлнинг ўлдирилишида гумон қилинаётган шахс — унинг турмуш ўртоғи. Хабарларга кўра, эркак фарзандларини кўриш учун аёлнинг уйига келган, аммо улар орасида можаро келиб чиққан. Можаро давомида у хотинини қўли билан бўғиб ўлдиргани айтилмоқда. Аёл воқеа жойида вафот этган.
Марҳуманинг акаси воқеа ҳақида аввал рафиқасидан, кейин эса онасидан эшитганини айтган.
«Синглим бундай ўлимга лойиқ эмас эди. У уч ўғилнинг онаси эди. Ким турмуш ўртоғига, фарзандларининг онасига қўл кўтаради?», – деди у ва айбдорга энг оғир жаза берилишини талаб қилди.
Бош прокуратура маълумотига кўра, қасддан одам ўлдиришда гумон қилинган 32 ёшли эркак қўлга олинган. Унга нисбатан Жиноят кодексининг 97-моддаси 1-қисми (қасддан одам ўлдириш) бўйича жиноят иши қўзғатилган.
