АҚШнинг Атлантик-Сити шаҳрида ўтказилган UFC Fight Night 241 турнири доирасида ўзбекистонлик Нурсултон Рўзибоев ҳам октагонга кўтарилди.
Асосий кардда америкалик Седрик Дюмага қарши баҳс олиб борган Рўзибоев 1-раунддаёқ рақибини техник нокаутга учратди. 1-раунд якунланишига 2 дақиқадан кам вақт қолганида Дюма кўзини ушлаган ҳолда бироз секинлашиб қолди, вазиятдан унумли фойдаланган ўзбекисонтлик жангчи эса тезликни оширди ва кетма-кет зарбалар йўллади. Дюманинг ўзини ҳимоя қила олмаётганини кўрган ҳакам эса баҳс тўхтатди.
Шундай қилиб Рўзибоев UFC'даги кетма-кет иккинчи ғалабага эришди. 30 ёшли спортчи дастлаб ташкилотда 2023 йил 1 июль куни бразилиялик Бруно Феррейрага қарши тўқнашувда зафар қучганди. 28 ёшли Дюма эса ММА'даги карьераси давомида учинчи мағлубиятини қабул қилиб олди.
